പുഴ.കോം > പുഴ മാഗസിന്‍ > കവിത > കൃതി

പാലം കടക്കുമ്പോൾ

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
പ്രമോദ്‌.പി. സെബാൻ

കവിത

കുറ്റിപ്പുറം പാലമെത്തുമ്പോളോർമ്മകൾ

കുന്നിറക്കത്തിലുരുളുന്ന പന്തുപോൽ.

എന്റെയും നിന്റെയും പാദംപുണർന്നലി-

ഞ്ഞാകെ കുളിർപ്പച്ചയായ നിളയുടെ

പ്രേതം വരണ്ടു കിടപ്പതുണ്ടാവുമീ

കാലം കനൽച്ചൂട്ടെരിക്കും നിലങ്ങളിൽ.

ലോറിയിൽ കേറിയൊടുക്കത്തെ ജീവനും

യാത്രപറയും പുഴയുടെ നൂതന

ദൃശ്യങ്ങളും ദൂരദർശനിൽ കണ്ടുനാ-

മാർത്തരായിട്ടുമിങ്ങെത്ര വേനൽ വന്നൂ!

ഉളളിൽ കലമ്പുന്ന ചക്രവേഗങ്ങൾക്കു-

മുമ്പിൽ പറക്കുന്ന ചിന്തയുമായി നീ

ഏറെത്തണുത്തൊരീ കാറ്റുവീശും ജനൽ

ചാരെ പുതപ്പിതിൽ നൂണ്ടുറങ്ങുന്നുവോ.

ലോകം മുഴുക്കെ പിണക്കമാണെന്നൊരു

ഭാവം മയങ്ങുന്ന നിൻമുഖതാവിൽ ഞാൻ

ആകെപ്പരതിത്തളരുന്നലിവിന്റെ

കണ്ണീർത്തെളിച്ചമലിയുന്ന സന്ധ്യയെ.

കുറ്റിപ്പുറം പാലമെന്നപോലൊക്കെയും

ഹൃത്തിൽ കനപ്പിച്ചൊടുക്കമെൻ ജീവനെ

വിട്ടുപിരികയാണെങ്കിലുമോമലേ;

ഒച്ചകളെല്ലാമകന്നുപോം കാലത്തിൽ

ഒറ്റപ്പെടലിന്റെ സാഗരം താണ്ടുവാ-

നെത്താതിരിക്കുമോ നോവും നിമിഷങ്ങൾ?

കുറ്റിപ്പുറം പാലമെത്തുന്നു തീവണ്ടി

കുറ്റിരുട്ടല്ലോ പുറത്തുളളിലെന്നപോൽ

രാവു ചിലപ്പോളനുഗ്രഹമാണിങ്ങു

കാണാതിരിക്കുവാനാരും പരസ്‌പരം.

പ്രമോദ്‌.പി. സെബാൻ

1975 ഏപ്രിൽ 4-ന്‌ കണ്ണൂർജില്ലയിൽ ആറളത്ത്‌ പി.ജി.സെബാസ്‌റ്റ്യന്റെയും ലീലാമ്മ ജോണിന്റെയും മകനായി ജനിച്ചു. ആറളം ഗവ.ഹൈസ്‌കൂൾ, എടൂർ സെന്റ്‌ മേരീസ്‌ ഹൈസ്‌കൂൾ, കൂത്തുപറമ്പ്‌ നിർമ്മലഗിരി കോളേജ്‌, കാലിക്കറ്റ്‌ സർവ്വകലാശാല ചരിത്രവിഭാഗം, കേരള സർവ്വകലാശാല ടീച്ചർ എഡ്യൂക്കേഷൻ സെന്റർ, തിരുവനന്തപുരം എന്നിവിടങ്ങളിൽ വിദ്യാഭ്യാസം. ചരിത്രത്തിൽ എം.എ.യും ബി.എഡ്‌ ബിരുദവും.

ആനുകാലികങ്ങളിൽ എഴുതാറുണ്ട്‌. കാലിക്കറ്റ്‌ സർവ്വകലാശാല എ സോണിൽ ചെറുകഥയ്‌ക്ക്‌ ഒന്നാംസ്ഥാനം. ‘നിളയിലെ മത്സ്യങ്ങൾ’ എന്ന കവിത കാലിക്കറ്റ്‌ സർവകലാശാല കാമ്പസ്‌ യൂണിയൻ 2001ൽ സംഘടിപ്പിച്ച സാഹിത്യോത്സവത്തിൽ ഒന്നാം സമ്മാനാർഹമായി. കണ്ണൂർ ആകാശവാണിനിലയം, ഏഷ്യാനെറ്റ്‌ എന്നിവിടങ്ങളിൽ കവിതകൾ അവതരിപ്പിച്ചിട്ടുണ്ട്‌.

പാരലൽ കോളേജ്‌ അധ്യാപകനായി ജോലി നോക്കുന്നു.

വിലാസം

പ്രതിഭ,

ആറളം പി.ഒ.,

കണ്ണൂർ

670 704
Phone: 0490 2450964




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.