കടലലകൾതൻ നിലവിളികളിൽ
കരൾനൊന്തേകയായ് കരയിൽ നില്പുഞ്ഞാൻ
ഇരുളിൽ കൂടുകൾ വെടിഞ്ഞ വാവലിൻ
നിരപോൽ തോണികളകലെക്കാണുന്നു
പടിഞ്ഞാറാകാശച്ചെരുവിൽ ചാരിയാ-
സലിലയാനങ്ങളുറങ്ങിടുന്നുവോ!
ജനനിക്കായ് മൃത്യുവരിച്ച വീരനാം
ജവാന്റെ ധന്യമാം ശിരസ്ത്രാണംപോലെ
തരംഗമാലയിൽ പകുതിയും താണ
ദിനകരബിംബമുണർത്തുന്നു ശോകം
അധോമുഖം നില്ക്കുമൊരു തോക്കിന്നൊപ്പം
കരിമുകിൽപ്പാളി തെളിഞ്ഞുകാണുന്നു!
