പുഴ.കോം > ഉണ്‍‌മ > കവിത > കൃതി

പ്രവാസിയുടെ ഗാനം

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
ഒ.എൻ.വി. കുറുപ്പ്‌

അമ്പിളിക്കുഞ്ഞും മയക്കമായീ, മേലേ

അന്തിമുകിലിന്റെ പൂമ്പട്ടു തൊട്ടിലിൽ

അമ്പിളിക്കുഞ്ഞും മയക്കമായീ.

നീരാഴി നീന്തിവരുന്ന കാറ്റേ! -യങ്ങു

ദൂരെയെൻ മൺപുര കണ്ടുവോ നീ?

മൺപുരയ്‌ക്കുള്ളിലെ തൊട്ടിലിൽ കൈവിര-

ലുണ്ടെൻ മണിക്കുഞ്ഞുറക്കമായോ?

അക്കുഞ്ഞിന്നച്ഛനെക്കാണാനുഴറുന്നൊ-

രമ്മതൻ താരാട്ട്‌ കേട്ടുവോ നീ?

മുറ്റത്തെത്തൈമാവിൽ രാക്കിളി തേങ്ങിയോ

എത്തിയില്ലേ ഇണപ്പക്ഷിയിന്നും?

മാവിലെപ്പൂത്തിരിത്തേനുരുകുന്നുവോ,

ഈ മരുഭൂവിലെൻ പ്രാണൻ പോലെ?

ചുട്ടുപൊള്ളും മണലാഴിയിലൂടെയൊ-

രൊട്ടകം പോലെ ഞാൻ നീന്തിടുന്നു.

ഓരോ പകലും ഇരവും ജപമണി-

പോലെണ്ണിയെണ്ണി ഞാൻ നീക്കിടുന്നു;

നല്ലിളന്നീരിന്റെ നാടുകാണാ,നെന്റെ

ചെല്ലക്കിളിക്കൂട്ടിൽ വീണ്ടുമെത്താൻ!

അന്തിമുകിൽത്തൊട്ടിലാരഴിയൂ? മേലേ

അമ്പിളിക്കുഞ്ഞ്‌ നിലത്തിഴഞ്ഞൂ...

അക്കരെയെൻ കുഞ്ഞിഴഞ്ഞു കളിക്കുന്ന-

തിക്കരെ നിന്നു ഞാൻ കാണും പോലെ...!

ഒ.എൻ.വി. കുറുപ്പ്‌




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.