പുഴ.കോം > കുട്ടികളുടെ പുഴ > കാട്ടുകഥ > കൃതി

കുറുക്കന്റെ സ്വാർത്ഥത

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
പുത്തൻവേലിക്കര സുകുമാരൻ

കഥ

വേട്ടനായ്‌ക്കൾ അതിവേഗം കുറുക്കനെ പിൻതുടർന്നു. കുറുക്കനും അതിനേക്കാൾ വേഗത്തിലോടി.

‘നായ്‌ക്കൾ ഒരുപാടുണ്ടല്ലോ! അതുകൊണ്ട്‌ ആക്രമണം മറ്റു ഭാഗങ്ങളിൽ നിന്നും ഉണ്ടായേക്കാം.’ കുറുക്കന്റെ ബുദ്ധിപ്രവർത്തിക്കാൻ കുടങ്ങി. ഉടനെ അവൻ വലിയ ഒരു കാരമുൾപ്പടർപ്പിനുളളിലേക്ക്‌ നുഴഞ്ഞുകയറുകയും ചെയ്‌തു.

‘ആ നായ്‌ക്കൾ ഈ മുൾപടർപ്പിലൂടെ തീർച്ചയായും വരില്ല.’ കുറുക്കൻ വിചാരിച്ചു. അപ്പോഴേയ്‌ക്കും നീണ്ടുകൂർത്ത ഒരു കാരമുളള്‌ അവന്റെ ഉളളം കാലിൽ തറഞ്ഞുകയറി.

‘ഇതെന്തുകഷ്‌ടം! പാപി ചെല്ലുന്നേടം പാതാളമെന്നുപറഞ്ഞതുപോലായല്ലോ.’ വേദനയോടെ കുറുക്കൻ പറഞ്ഞുഃ “എടോ, മുൾക്കാടേ! നീയെന്തു തെമ്മാടിത്തരമാണ്‌ കാട്ടിയത്‌? ഞാൻ നിന്റെ സഹായം തേടിയല്ലേ ഇവിടെ വന്നത്‌? എന്നിട്ടും നീയെന്നെ കുത്തി നോവിക്കുകയാണല്ലോ!”

“അങ്ങനെ പറയാതെ കുറുക്കച്ചാരേ!” മുൾക്കാടു പറഞ്ഞുഃ “പേടിച്ചോടിയ നീ, പിൻകാലുകൾക്കിടയിൽ വാലും തിരുകി ഇങ്ങോട്ടു വലിഞ്ഞു കയറിയതല്ലേ? ഞാൻ ഇങ്ങോട്ടു നിന്നെ ക്ഷണിച്ചോ? എനിക്ക്‌ മുളളുണ്ടെന്ന്‌ അറിഞ്ഞുകൊണ്ടല്ലേ നീ വന്നത്‌? നീ നായ്‌ക്കളുടെ ദേഹത്ത്‌ മുളളു തറയ്‌ക്കാൻ വേണ്ടിയല്ലേ ഇങ്ങോട്ടു വന്നത്‌? അതിന്റെ തിക്തഫലം നീ തന്നെ അനുഭവിക്കേണ്ടിവന്നു. നിന്റെ സ്വാർത്ഥതയാണ്‌ ഈ കുഴപ്പത്തിനൊക്കെ കാരണം.”

മുൾക്കാടിന്റെ നീണ്ടപ്രസംഗം കേട്ടും വേട്ടനായ്‌ക്കൾ വരുന്നുണ്ടോ എന്നു ശ്രദ്ധിച്ചും കുറുക്കൻ തന്റെ കാലിലെ മുറിപ്പാടിലെ രക്തം നക്കിത്തുടച്ചുകൊണ്ട്‌ അവിടെ ഏറെ നേരം നിന്നു.

പുത്തൻവേലിക്കര സുകുമാരൻ

1937 ഡിസംബർ 27-ന്‌ വടക്കൻ പറവൂരിലെ പുത്തൻവേലിക്കരയിൽ ജനിച്ചു. ബി.എ .ബി.എഡ്‌ പാസ്സായിട്ടുണ്ട്‌. രണ്ടരവർഷക്കാലം പോലീസ്‌ ഡിപ്പാർട്ട്‌മെന്റിൽ ക്ലാർക്കായും 29 വർഷക്കാലം അദ്ധ്യാപകനായും ജോലി ചെയ്‌തു. 1993 മാർച്ചിൽ റിട്ടയർ ചെയ്‌തു. വിദ്യാർത്ഥിയായിരുന്നക്കാലം മുതൽ കവിതകൾ എഴുതുമായിരുന്നു. കഴിഞ്ഞ പത്തുവർഷക്കാലമായി ബാലസാഹിത്യരംഗത്ത്‌ പ്രവർത്തിച്ചുവരുന്നു. ഇപ്പോൾ കൊടുങ്ങല്ലൂർ ആസ്ഥാനമായി പ്രവർത്തിച്ചുകൊണ്ടിരിക്കുന്ന ബാലസാഹിത്യസമിതിയുടെ പ്രസിഡന്റാണ്‌. പന്ത്രണ്ടോളം ബാലസാഹിത്യകൃതികൾ പ്രസിദ്ധീകരിച്ചിട്ടുണ്ട്‌. മണിച്ചെപ്പ്‌, പൂത്താലം, വെളളിക്കിണ്ണം, കാട്ടിലെകഥകൾ, കുറുക്കന്റെ സ്‌നേഹം, കഴുതയുടെ തലച്ചോറ്‌ മുതലായവയാണ്‌ മുഖ്യ കൃതികൾ.

ആരോഗ്യവകുപ്പിൽ ട്രീറ്റുമെന്റ്‌ ഓർഗനൈസറായിരുന്ന എ.രത്നാഭായിയാണ്‌ ഭാര്യ.

വിലാസം

“സൗരഭം”, പുത്തൻവേലിക്കര.പി.ഒ., എറണാകുളം

683 594
Phone: 0484 487014




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.