കാലം തീർത്തൊരു വേദികയിൽ,
ആടിയുലഞ്ഞുയരും,
യവനിക.
പടുതിരി കത്തും കളിവിളക്ക്
നിയോഗമറിയാത്ത വേഷക്കാരുടെ-
കണ്ണീര് കൊണ്ടു രംഗപൂജ.
നടനം മറന്ന നടിയുടെ -
മിഴി നിറഞ്ഞൊഴുകും
വാചാല മൗനം.
അധരത്തിൽ പിടഞ്ഞൊളിക്കും
തേങ്ങൽ.
കരംഗ്രഹിച്ചവളോട്-
വിടചൊല്ലും നടന്റെയുളളിൽ-
കനൽ.
കൈവീശിയവനകലുമ്പോളൊരു-
കുരുന്നു വിലാപത്തിൻ-
പിൻവിളി....
ആത്മനൊമ്പരങ്ങളുടെ-
കണ്ണീർ മുത്തണിഞ്ഞ്-
ഭാവം പകർന്നാടി-
വേഷക്കാർ,
അണിയറയിലേയ്ക്ക്,
മടങ്ങുമ്പോൾ,
ഇടനെഞ്ച് നീറും-
പ്രവാസി,
ഗൃഹാതുരമാമൊരു-
കിനാവ് കണ്ട്
ദേശാന്തരവാസം തുടങ്ങുന്നു...
|
|
|
|
സുനിൽ സി.പി. വിദ്യാഭ്യാസംഃ ബി.എ. 34 വയസ്സ്
കേരള കൗമുദിയിൽ പ്രസിദ്ധീകരിച്ച ‘വേനൽമഴ’യാണ് ആദ്യ കവിത. കവിത കൂടാതെ ‘ശമനതാളം’, ‘ഒരു വിശുദ്ധന്റെ ആത്മാവ്’, ‘സ്വപ്നങ്ങളുടെ വിലാപയാത്ര’, തുടങ്ങിയ ചെറുകഥകളും എഴുതിയിട്ടുണ്ട്. 1991- മുതൽ സൗദി അറേബ്യയിലെ റിയാദിൽ ജോലി നോക്കുന്നു.
വിലാസംഃ
ചിലമ്പശ്ശേരിൽ
ഇളമ്പഴന്നൂർ പി.ഒ.
ചടയമംഗലം
കൊല്ലം - 691 534.
റിയാദിലെ വിലാസംഃ
പി.ബി. നം. 50743
റിയാദ് 11533
കെ.എസ്.എ.
|
|
|
|
|
|