പുഴ.കോം > പുഴ മാഗസിന്‍ > കവിത > കൃതി

ഉറക്കം-സ്വപ്നം-ജീവിതം

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
മുരളി മങ്കര

കവിത

തീർച്ചയായും

ഉറക്കത്തിനും ഉണർവ്വിനുമിടയ്‌ക്കുളള

തുടർച്ചയാണ്‌ സ്വപ്നം.

സ്വപ്നത്തിൽ ആകാശംതൊടുന്നവനും

ആഴക്കടൽ താണ്ടുന്നവനും

ഉണരുന്നതോടെ

അവനവനെ തൊടുന്നു.

ഉണരുന്നതിനുമുമ്പേ മറക്കുന്ന

സ്വപ്നങ്ങളാണ്‌ മനോഹരം

(ജീവിതംപോലും മറക്കുന്നതാണ്‌ മുക്തി എന്ന്‌ മഹർഷികൾ)

ഓർമ്മയിൽ നില്‌ക്കുന്ന സ്വപ്നങ്ങൾ

ആരോടെങ്കിലും പറയാതെ വയ്യ

(പലപ്പോലും നാമനുഭവിച്ചത്രയും

കേൾക്കുന്നവന്‌ രസിക്കാറില്ല).

നല്ല സ്വപ്നത്തിന്റെ താമരനൂലിൽ

പകൽക്കിനാവുകാണാം.

കാരണം

പകൽക്കിനാവിന്‌ കാല്പനികഭാവം

ചാർത്തികൊടുത്തിട്ടുണ്ട്‌

കവികൾ-സ്വപ്നജീവികൾ.

ചിലർക്കു ചിലകാലമൊക്കുന്ന സ്വപ്നങ്ങൾ

പ്രതീക്ഷിക്കാതെ കയറിവരികയാണ്‌ പതിവ്‌

സംഭവിച്ചതും

സംഭവിക്കുന്നതും നല്ലതിന്‌

എന്ന ശുഭാപ്തിവിശ്വാസക്കാരന്‌

ഇതിലപ്പുറമെന്തുവേണം?

ഉറക്കമില്ലായ്മ പേടിസ്വപ്നമാണ്‌

ഉറക്കം നിറയെ നാനാർത്ഥം നിറഞ്ഞ സ്വപ്നങ്ങൾ.

ഉണരാതിരിക്കരുതേ എന്നത്‌ പ്രാർത്ഥനയാണ്‌.

ചുരുക്കത്തിൽ

സ്വപ്നങ്ങളില്ലാത്ത ഉണർവ്വാകട്ടെ ജീവിതം.

-അതാണെന്റെ സ്വപ്നം......

മുരളി മങ്കര

പേര്‌ഃ മുരളീധരൻ സി.കെ. പാലക്കാട്‌ വിക്‌ടോറിയാകോളേജിലും ഒറ്റപ്പാലം എൻ.എസ്‌.എസ്‌ കോളേജിലും വിദ്യാഭ്യാസം. ഇപ്പോൾ കേരളവാട്ടർ അതോറിറ്റിയുടെ പാലക്കാട്‌ ഓഫീസിൽ ഗുമസ്‌തൻ. ആനുകാലികങ്ങളിൽ ഇടയ്‌ക്കെല്ലാം കഥ, കവിത, ലേഖനം എന്നിവ എഴുതാറുണ്ട്‌. ചിത്രരചനയിൽ അതിയായ താല്പര്യമുണ്ട്‌. തിരുവനന്തപുരം ദൂരദർശനുവേണ്ടി നിർമ്മിച്ച നാലു ഡോക്യുമെന്ററികൾക്ക്‌ തിരക്കഥ എഴുതി (മഹാകവി പി, അക്കിത്തം, കഥാകാരി രാജലക്ഷ്‌മി, പറയിപ്പെറ്റ പന്തിരുകുലം എന്നിവരെകുറിച്ചു നിർമ്മിച്ചത്‌) മാധ്യമപഠന കേന്ദ്രത്തിന്റെ അവാർഡു ലഭിച്ച ‘നിളയുടെ കണ്ണീർച്ചാലുകൾ’ തുടങ്ങി ഇരുപതോളം ഡോക്യുമെന്ററികളുടെ സഹസംവിധായകനായിരുന്നു. 2000ത്തിലെ ഗാന്ധിജയന്തിയോടനുബന്ധിച്ച്‌ ‘സൂര്യ’ സംപ്രേഷണം ചെയ്‌ത ഗാന്ധിജയന്തി സ്പെഷൽ ‘രഘുപതിരാഘവ.....’ എന്ന ഡോക്യുമെന്ററിയുടെ സംവിധായകനായിരുന്നു.

വിവാഹിതൻ. ഭാര്യഃ അഡ്വ.കെ.പി. സുമ. മകൻഃ ബാലമുരളി.

വിലാസംഃ കോമളാനിവാസ്‌, മങ്കര പി.ഒ., പാലക്കാട്‌ - 678613




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.