പുഴ.കോം > പുഴ മാഗസിന്‍ > കവിത > കൃതി

തൃശ്ശൂർ റൗണ്ട്‌

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
മുരളി മങ്കര

കവിത

ശരിക്കും

മലയാളത്തിൽ പറഞ്ഞാൽ

ഇത്‌ തൃശൂർ റൗണ്ട്‌

പുറപ്പെട്ടിടത്തുതന്നെ എത്തണമെങ്കിൽ

തൃശൂർ റൗണ്ടിലൂടെ നടക്കണം.

റൗണ്ടിലൂടെ നടക്കുമ്പോൾ

എപ്പോൾ വേണമെങ്കിലും താഴേക്കിറങ്ങാം.

ബസ്‌ സ്‌റ്റാന്റിലേക്ക്‌,

റെയിൽവേ സ്‌റ്റേഷനിലേക്ക്‌,

ആശുപത്രിയിലേക്ക്‌

സിനിമാതിയ്യേറ്ററിലേക്ക്‌

ജ്വല്ലറികളിലേക്ക്‌

കവിയരങ്ങിലേക്ക്‌...

ലോകത്തിന്റെ ഏതുഭാവത്തിലേക്കും

ഇറങ്ങിച്ചെല്ലാം.

എപ്പോൾ വേണമെങ്കിലും

മുകളിലോട്ടു കയറി

ഗ്രൗണ്ട്‌ മുറിച്ചുകടക്കാം.

വഴിക്കു കുറുകെ

-ഒറ്റ നമ്പറുകാരൻ

നാളേക്കു നീട്ടിവയ്‌ക്കുന്ന ജീവിതങ്ങൾ

അവനെ കാണാതെവയ്യ.

-പ്രണയാതുരർ

അവർ തോളുരുമ്മി പറഞ്ഞു തീരാത്തതെല്ലാം

കഥകളാവുന്നു.

പറഞ്ഞതെല്ലാം മറവിയിലും

-മരച്ചുവട്ടിലെ വേശ്യ

വേദാന്തികൾ പഠിക്കാൻ മറന്നപാഠം

പാപം... പാപം..

-കൈനോട്ടക്കാരൻ

സ്വന്തം ഭാവിയിൽ

ഭൂതങ്ങൾ വർത്തമാനം

പറയുന്ന ജന്മം.

-റിട്ടയേർഡ്‌ വിപ്ലവകാരികൾ

-സാഹിത്യകാരൻമാർ

-അക്ഷരശ്ലോകക്കാർ....

വല്ലപ്പോഴും

ശക്തൻ തമ്പുരാൻ

വൈലോപ്പിളളി, അച്യുതമേനോൻ...

ആരേയും കണ്ടുമുട്ടാം.

പകുതിയും നടന്നെത്തുമ്പോൾ

വടക്കുംനാഥൻ,

അഷ്‌ടദിക്‌ പാലകൻ

എട്ടുദിക്കിലേയും നേർവഴികൾ

തന്നിലെത്തുന്നുവെന്നറിവോൻ.

. . . . . . . . .

റൗണ്ടിന്റെ ഏതുഭാഗത്തുനിന്നും

മുകളിലോട്ടു കയറാം.

അപ്പോൾ ഞാനും നിങ്ങളും ചേർന്ന

പുരുഷാരമായി.

പൂരമായി.

പൂരവും പുരുഷാരവും

മാറിനിന്നു കാണാൻ

ഞാനും നിങ്ങളും തന്നെ

വേണമെന്ന അറിവായി

. . . . . . . . .

അച്ചുതണ്ടിനു മുകളിലേ നില്പൂ

വടക്കുംനാഥൻ

എന്ന കല്പനയുടെ നേരറിവായി.

. . . . . . . . . .

തൃശൂർ റൗണ്ടിലൂടെ നടന്നാൽ

പുറപ്പെട്ടിടത്തുതന്നെയെത്താം.

മുരളി മങ്കര

പേര്‌ഃ മുരളീധരൻ സി.കെ. പാലക്കാട്‌ വിക്‌ടോറിയാകോളേജിലും ഒറ്റപ്പാലം എൻ.എസ്‌.എസ്‌ കോളേജിലും വിദ്യാഭ്യാസം. ഇപ്പോൾ കേരളവാട്ടർ അതോറിറ്റിയുടെ പാലക്കാട്‌ ഓഫീസിൽ ഗുമസ്‌തൻ. ആനുകാലികങ്ങളിൽ ഇടയ്‌ക്കെല്ലാം കഥ, കവിത, ലേഖനം എന്നിവ എഴുതാറുണ്ട്‌. ചിത്രരചനയിൽ അതിയായ താല്പര്യമുണ്ട്‌. തിരുവനന്തപുരം ദൂരദർശനുവേണ്ടി നിർമ്മിച്ച നാലു ഡോക്യുമെന്ററികൾക്ക്‌ തിരക്കഥ എഴുതി (മഹാകവി പി, അക്കിത്തം, കഥാകാരി രാജലക്ഷ്‌മി, പറയിപ്പെറ്റ പന്തിരുകുലം എന്നിവരെകുറിച്ചു നിർമ്മിച്ചത്‌) മാധ്യമപഠന കേന്ദ്രത്തിന്റെ അവാർഡു ലഭിച്ച ‘നിളയുടെ കണ്ണീർച്ചാലുകൾ’ തുടങ്ങി ഇരുപതോളം ഡോക്യുമെന്ററികളുടെ സഹസംവിധായകനായിരുന്നു. 2000ത്തിലെ ഗാന്ധിജയന്തിയോടനുബന്ധിച്ച്‌ ‘സൂര്യ’ സംപ്രേഷണം ചെയ്‌ത ഗാന്ധിജയന്തി സ്പെഷൽ ‘രഘുപതിരാഘവ.....’ എന്ന ഡോക്യുമെന്ററിയുടെ സംവിധായകനായിരുന്നു.

വിവാഹിതൻ. ഭാര്യഃ അഡ്വ.കെ.പി. സുമ. മകൻഃ ബാലമുരളി.

വിലാസംഃ കോമളാനിവാസ്‌, മങ്കര പി.ഒ., പാലക്കാട്‌ - 678613




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.