പുഴ.കോം > പുഴ മാഗസിന്‍ > കവിത > കൃതി

ഡോക്യുമെന്ററികൾ

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
മുരളി മങ്കര

കവിത

ആദ്യമായി

ഭ്രാന്തന്മാരെക്കുറിച്ചെടുത്ത

ഡോക്യുമെന്ററിക്ക്‌

ഉടുത്ത ഭ്രാന്തെന്നും

ഉടുക്കാത്ത ഭ്രാന്തെന്നും

രണ്ട്‌ എപ്പിസോഡുണ്ടായിരുന്നു.

ഏതു ഭ്രാന്തിന്റെയും

അഭിമുഖമുണ്ടായിരുന്നില്ല.

ആവശ്യത്തിനു സ്പോൺസർമാരുണ്ടായിരുന്നു.

കൊടുങ്കാറ്റിനെക്കുറിച്ചാണ്‌

അടുത്ത ഡോക്യുമെന്ററി.

കാറ്റിനോടും കാടിനോടും

സംസാരിച്ചു തിയ്യതി വാങ്ങിയിട്ടുണ്ട്‌.

തിരമാലകളോടും മേഘങ്ങളോടും

ദിവസം പറഞ്ഞിട്ടുണ്ട്‌.

വേണ്ടതുപോലെ കാമറയിലേക്ക്‌

കയറിവരാം എന്നു കടൽ.

തുളളിക്കൊരു കുടത്തിൽ

ഒട്ടുംകുറയില്ലെന്ന്‌ മേഘങ്ങൾ.

നേരെ മുന്നിലേക്ക്‌ അലറിവീഴാം

എന്ന്‌ പേരറിയാമരം.

ഒരു കൊമ്പുമാത്രം ഒടിച്ച്‌

സഹകരിക്കാമെന്ന്‌ പിശുക്കൻമരം.

തെറിച്ചുവീഴുന്ന പക്ഷിക്കൂട്‌

കലാസംവിധായകന്റെ വക.

സിംഹത്തേയും കുറുക്കനേയും കണ്ടില്ല.

മാനും മുയലും മുന്നിലേക്കു വന്നില്ല.

കഴുകനും കുരുവിയും ആകാശത്തു നിന്നിറങ്ങിയില്ല.

പകരം വനപാലകന്റെ അഭിമുഖം.

കാട്ടിലെ സെൻസസിന്റെ

വിശദവിവരങ്ങൾ.

നഷ്‌ടമായ കഞ്ചാവിനും കുറുന്തോട്ടിക്കും

കണ്ണോക്ക്‌.

(അഭിമുഖത്തിൽ വനപാലകന്റെ -

മുഖം കാണിക്കില്ല)

താഴ്‌വാരത്തിലെ ജനങ്ങളോടു

വിവരം പറഞ്ഞിട്ടില്ല.

ശവങ്ങൾ-

സഹകരിച്ചില്ലെങ്കിലോ?

കൊടുങ്കാറ്റിനുശേഷം

അവരുടെ കറുപ്പും വെളുപ്പും

‘ലൈവാ’യി ചിത്രീകരിക്കാമെന്ന്‌ നിർമ്മാതാവ്‌.

........ സ്‌റ്റാർട്ട്‌..... ആക്‌ഷൻ

. . . . . . . . . . . .

ഒടുവിൽ

കടലെടുത്ത കാമറ

കരയ്‌ക്കടിയുമ്പോൾ

ഏതു ജീവിതമാണ്‌ പറഞ്ഞുതരുക.

കൊടുങ്കാറ്റിനുശേഷം

ബാക്കിവന്ന കഥകൾ

ആരു ചിത്രീകരിക്കും?

എത്ര സ്പോൺസർമാരുണ്ടാവും.


മുരളി മങ്കര

പേര്‌ഃ മുരളീധരൻ സി.കെ. പാലക്കാട്‌ വിക്‌ടോറിയാകോളേജിലും ഒറ്റപ്പാലം എൻ.എസ്‌.എസ്‌ കോളേജിലും വിദ്യാഭ്യാസം. ഇപ്പോൾ കേരളവാട്ടർ അതോറിറ്റിയുടെ പാലക്കാട്‌ ഓഫീസിൽ ഗുമസ്‌തൻ. ആനുകാലികങ്ങളിൽ ഇടയ്‌ക്കെല്ലാം കഥ, കവിത, ലേഖനം എന്നിവ എഴുതാറുണ്ട്‌. ചിത്രരചനയിൽ അതിയായ താല്പര്യമുണ്ട്‌. തിരുവനന്തപുരം ദൂരദർശനുവേണ്ടി നിർമ്മിച്ച നാലു ഡോക്യുമെന്ററികൾക്ക്‌ തിരക്കഥ എഴുതി (മഹാകവി പി, അക്കിത്തം, കഥാകാരി രാജലക്ഷ്‌മി, പറയിപ്പെറ്റ പന്തിരുകുലം എന്നിവരെകുറിച്ചു നിർമ്മിച്ചത്‌) മാധ്യമപഠന കേന്ദ്രത്തിന്റെ അവാർഡു ലഭിച്ച ‘നിളയുടെ കണ്ണീർച്ചാലുകൾ’ തുടങ്ങി ഇരുപതോളം ഡോക്യുമെന്ററികളുടെ സഹസംവിധായകനായിരുന്നു. 2000ത്തിലെ ഗാന്ധിജയന്തിയോടനുബന്ധിച്ച്‌ ‘സൂര്യ’ സംപ്രേഷണം ചെയ്‌ത ഗാന്ധിജയന്തി സ്പെഷൽ ‘രഘുപതിരാഘവ.....’ എന്ന ഡോക്യുമെന്ററിയുടെ സംവിധായകനായിരുന്നു.

വിവാഹിതൻ. ഭാര്യഃ അഡ്വ.കെ.പി. സുമ. മകൻഃ ബാലമുരളി.

വിലാസംഃ കോമളാനിവാസ്‌, മങ്കര പി.ഒ., പാലക്കാട്‌ - 678613




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.