പുഴ.കോം > പുഴ മാഗസിന്‍ > കവിത > കൃതി

പുതിയ പുസ്‌തകം

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
പ്രമോദ്‌.പി. സെബാൻ

കവിത

പഴയ സ്നേഹിതാ, മനനം ചെയ്തൊരാ

പഴയ പാഠങ്ങൾ മറന്നുപോവുക.

കലക്കമാണെങ്കിലവനവൻ തന്നെ

കൊരുത്തു ചൂണ്ടയിൽ പിടഞ്ഞുതാഴണം

പെരുത്ത മീനുകൾ, പഴയ സ്രാവുകൾ

ഇടറിയെത്തുന്ന സ്‌മരണകൾ തെന്നി

ഇവിടെയെത്തിടുമൊരിക്കലെങ്കിലും

കലക്കവെളളങ്ങളൊഴുകിടുന്നൊരീ

പുഴക്കരയിൽ കാത്തിരിക്കണം മനം

അടിച്ചു നീർത്തൊരു പിടിയുമായ്‌ സ്വയം.

അഴികളിൽപ്പെട്ട മൃഗത്തെയെന്നോണം

ഇളിച്ചുകാട്ടിയും എറിഞ്ഞുനോക്കിയും

പുറത്തു നിൽക്കുന്ന മനുഷ്യരൊക്കെയും

ഭരിച്ചിരുന്നൊരു പകലമർന്നുപോയ്‌.

മുറിവുകൾ നക്കിയുണക്കി ജീവിതം

വെടിച്ചു ദുഃഖങ്ങൾ പുതച്ചിരിക്കിലും

പകിട പോലെങ്ങോ കറങ്ങിവീഴവേ

മറക്ക വയ്യെന്റെ പഴന്തിണർപ്പുകൾ

തണുത്ത ചാരത്തിന്നകത്തണയാതെ

കനത്തു നീറുന്നു മുറിഞ്ഞ മാനസം.

പഴയ സ്നേഹിതാ, മുഖത്തു നിന്നുമീ

വ്യഥിത ഭാവങ്ങളടർത്തി മാറ്റുക

പഴയ പാട്ടിലെ വിവശവേഷങ്ങൾ

നിരത്തു വാണിഭരെറിഞ്ഞ നാണയം

അതിനു കിട്ടില്ല തെരുവുകുട്ടികൾ

മനസ്സിൽ ചിന്തുന്ന കനിവുതൂളികൾ.

മഴകളൊക്കെയുമൊഴിഞ്ഞ മാനത്ത്‌

തുറന്ന ജാലക മരത്തണുപ്പിതിൽ

പുതിയ പാഠത്തിന്നറിവുമായുയിർ

പറിഞ്ഞു പോവുന്ന കഠിനനൊമ്പരം

മിഴികൾ പൂട്ടുക, കരം പിടിക്കുക

തുറമുഖങ്ങൾ കാത്തിരിപ്പു നമ്മളെ.

പഴയ സ്നേഹിതാ, പറഞ്ഞതൊക്കെയും

മനനം ചെയ്‌തൊരീ പുതിയ പുസ്‌തകം

കരത്തിലേറുക, കലക്കമാണുളളം

പതഞ്ഞൊഴുകുന്നു കരയ്‌ക്കിരിക്കണം.


പ്രമോദ്‌.പി. സെബാൻ

1975 ഏപ്രിൽ 4-ന്‌ കണ്ണൂർജില്ലയിൽ ആറളത്ത്‌ പി.ജി.സെബാസ്‌റ്റ്യന്റെയും ലീലാമ്മ ജോണിന്റെയും മകനായി ജനിച്ചു. ആറളം ഗവ.ഹൈസ്‌കൂൾ, എടൂർ സെന്റ്‌ മേരീസ്‌ ഹൈസ്‌കൂൾ, കൂത്തുപറമ്പ്‌ നിർമ്മലഗിരി കോളേജ്‌, കാലിക്കറ്റ്‌ സർവ്വകലാശാല ചരിത്രവിഭാഗം, കേരള സർവ്വകലാശാല ടീച്ചർ എഡ്യൂക്കേഷൻ സെന്റർ, തിരുവനന്തപുരം എന്നിവിടങ്ങളിൽ വിദ്യാഭ്യാസം. ചരിത്രത്തിൽ എം.എ.യും ബി.എഡ്‌ ബിരുദവും.

ആനുകാലികങ്ങളിൽ എഴുതാറുണ്ട്‌. കാലിക്കറ്റ്‌ സർവ്വകലാശാല എ സോണിൽ ചെറുകഥയ്‌ക്ക്‌ ഒന്നാംസ്ഥാനം. ‘നിളയിലെ മത്സ്യങ്ങൾ’ എന്ന കവിത കാലിക്കറ്റ്‌ സർവകലാശാല കാമ്പസ്‌ യൂണിയൻ 2001ൽ സംഘടിപ്പിച്ച സാഹിത്യോത്സവത്തിൽ ഒന്നാം സമ്മാനാർഹമായി. കണ്ണൂർ ആകാശവാണിനിലയം, ഏഷ്യാനെറ്റ്‌ എന്നിവിടങ്ങളിൽ കവിതകൾ അവതരിപ്പിച്ചിട്ടുണ്ട്‌.

പാരലൽ കോളേജ്‌ അധ്യാപകനായി ജോലി നോക്കുന്നു.

വിലാസം

പ്രതിഭ,

ആറളം പി.ഒ.,

കണ്ണൂർ

670 704
Phone: 0490 2450964




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.