ഒരു നേരത്തെ അന്നത്തിന്-
നിന്റെ വാതിലിൽ മുട്ടിയപ്പോൾ
എന്നെ ആട്ടിയിറക്കിയോൻ
എന്റെ വിശന്നൊട്ടിയ വയറിൽ-
കൊഴുത്ത കാൽകൊണ്ട് ചവിട്ടിയോൻ.
വലിയ ജാതിത്തേരിലിരുന്ന്-
ചെറിയ ജാതിയെ തൊഴിച്ചോൻ,
ദേഹം മറയ്ക്കാനല്പം-
വസ്ത്രമിരന്നപ്പോൾ,
ചാട്ടവാറെൻ നഗ്നതയിൽ-
പതിപ്പിച്ചോൻ
തല ചായ്ക്കാനിടമില്ലാതെ-
ഞാൻ തണുത്തു വിറച്ചപ്പോൾ,
മണിമാളികയിലൊന്നുമറിയാതെ-
പുതച്ചു മൂടിയുറങ്ങിയോൻ
ഇന്ന്,
നീയെന്നെ-അറിയുന്നു
നീയും, ഞാനും-
ഒന്നിച്ചുറങ്ങുന്നു.
അന്നത്തിനായ്,
ഒന്നിച്ചിരക്കുന്നു.
ഭൂചലനരേഖയിൽ-
നമ്മൾ
ഒരുമയോടെ നീങ്ങുന്നു.
|
|
|
|
ഒഴുകുപാറ സത്യൻ തിരുവനന്തപുരം ആയൂർവ്വേദകോളേജിൽ നിന്നും ഫാർമസിയിൽ ഡിപ്ലോമ. ഇപ്പോൾ അണ്ടൂർക്കോണം ഗവ. ആയൂർവ്വേദഡിസ്പെൻസറിയിൽ ഫാർമസിസ്റ്റായി ജോലി നോക്കുന്നു. കേരള കൗമുദി വീക്കെൻഡ് മാഗസിൻ, ഉണ്മ മാസിക, മനോരാജ്യം, കുലീന എന്നിവയിൽ കവിതകൾ പ്രസിദ്ധീകരിച്ചിട്ടുണ്ട്. കൂടാതെ ഉണ്മ പബ്ലിക്കേഷന്റെ കാവ്യസപ്തകം എന്ന കവിതാസമാഹാരത്തിലും, യുവകലാസാഹിതിയുടെ കവിതാസമാഹാരത്തിലും കവിതകൾ ഉൾപ്പെടുത്തിയിട്ടുണ്ട്.
ഭാര്യ ഃ ശ്രീലത (റീന)
വിലാസം
ഒഴുകുപാറ സത്യൻ
വട്ടപ്പാറ പി.ഒ.
തിരുവനന്തപുരം- 695028.
|
|
|
|
|
|