കാർന്നോരിന്നലെ തെക്കോട്ട് പോയപ്പൊ
ഏന്റെയുളളത്തില് നെഞ്ചത്തടി.
കർക്കടപ്പെയ്ത്തിലെൻ കൂരയൊലിച്ചപ്പോ
ഏന്റെയുളളത്തില് ശ്വാസംമുട്ട്.
കണ്ടം മുറിച്ചിട്ട് റോഡ് നീണ്ടപ്പൊ
ഏന്റെയുളളത്തില് കൊടുവാൾക്കൊത്ത്.
ജാതിതിരിഞ്ഞെന്റെ നാട്ടാര് മുട്ട്യപ്പൊ
ഏന്റെയുളളത്തില് പൊട്ടനാട്ടം.
വണ്ടിയിടിച്ചെന്റെ പെണ്ണ് ചത്തപ്പോ
ഏന്റെയുളളത്തില് ചെഞ്ചോര.
ഷ്ക്ക്വൊള് വിട്ടെന്റെ മോള് വന്നിട്ടില്ല...
അടിയാന്റെ ഉളളമേ പണ്ടാറടങ്ങ്.