പുഴ.കോം > സായഹ്നകൈരളി > കവിത > കൃതി

അണിയിൽ ദേശത്തെ കുമാരേട്ടൻ

അഭിപ്രായം എഴുതുക
ഇ-മെയില്‍ ചെയ്യുക
പ്രിന്റ് ചെയ്യുക
ഐ.ആർ.കൃഷ്‌ണൻ, മേത്തല

കവിത

കുഞ്ഞായിരുന്നൊരെന്നോർമ്മതൻ

കാൻവാസിലെന്നും തെളിവാർന്ന ചിത്രം

അണിയിൽ മാർക്കറ്റിലും പരിസര

ഭാഗത്തുമങ്ങിങ്ങരങ്ങിലെ രംഗം

അഞ്ചാറുകൂട്ടുകാർ അവരിലൊ-

രാളത്രെ ചേട്ടനാ ‘പൊട്ടൻകുമാരൻ’

കല്യാണപ്പന്തലിൽ, കലവറതന്നിലും

കായികാധ്വാനിയാം ചേട്ടൻ

ചേട്ടന്റെ സേവനഭാവവും സ്‌നേഹവു

മിന്നുമുൾകണ്ണിൽ തിളക്കം

കുഴിയണ്ടി, പഞ്ചീസുകളികളിൽ

പകിടയിൽകൂടിയും ചേട്ടനുണ്ടാവും

കളിയിൽ ജയിക്കാൻ കൊതിപൂണ്ട

കൂട്ടരന്നൊരുവേള തർക്കത്തിലെത്തും

അവരുടെ കൊഞ്ഞനം, കോക്രികൾ

ഹാ! പാവമവമാനിതൻ മൗനിയാകും

കദനഭാരം തിങ്ങിവിങ്ങും മനസ്സിലേ-

ക്കൊരുതെന്നലായവളെത്തും

കൈവിരൽ, കണ്ണുകൾ, ചുണ്ടതും

സാന്ത്വനഭാവഗീതങ്ങൾ രചിക്കും

നിമിഷങ്ങൾ നീങ്ങേ വിവർണ്ണമാം

വക്‌ത്രത്തിലൊരു പുഞ്ചിരിപ്പൂവിടരും

വീടിന്റെ നാഥനാം ചേട്ടനെന്നും

തന്റെ ജീവിതനൗക തുഴയാൻ

കൊച്ചിയഴിമുഖം രണ്ടുവട്ടം

കടന്നെത്തുകയായെന്നുമെന്നും

വേനൽപോയ്‌ കാറ്റുമായെത്തി

മഴ-അഴിഭാവം പകരുകയായി

തിരമാലവൻമതിൽ നിർമ്മിച്ചു

വഞ്ചിമേൽവീണുടഞ്ഞെങ്ങോ മറഞ്ഞു...

അണിയത്തുപണിയിൽ മുഴുകി

ക്കഴിഞ്ഞൊരാച്ചേട്ടനെ കണ്ടതില്ലെങ്ങും!

ഓളങ്ങളിൽ, നീരൊഴുക്കിലെൻ

ചേട്ടനിന്നാഴക്കടലിന്റെയംശം!


ഐ.ആർ.കൃഷ്‌ണൻ, മേത്തല




Puzha Magazine| Non-Resident Keralite| Puzha Kids| Folk Arts and Culture| Classics| Astrology| Obituaries| Matrimonial| Classifieds| Business Links| Audio Station| Responses| Your Articles| Malayalam Mail| Archives| Downloads
Disclaimer and Legal Notice

Copyright  1999-2007 Puzha.com
All rights reserved.